Këngë për martesën_Bob Dylan

Të dua më shumë se kurrë, më shumë se kohën se vetë dashurinë,

Të dua më shumë se paratë, se yjet që kanë pushtuar lartësitë,

Të dua më shumë se çmendurinë, dhe se dallgët që deti ngre

Të dua më shumë se vetë jetën, më je më e shtrenjta mbi dhé

Qëkur u shfaqe në jetën time, ti gjysma tjetër më bëre të plotë,

I thashë lamtumirë boshit në odë, të panjohurve në botë,

Kllounit të oborrit mbretëror prej dritës së diellit përzënë

Të dua më shumë se kurrë e prapë kam shumë për të thënë

Më dhe frymë dhe jetës time i dhe kaq shumë kuptim,

Më mësove të jap kur zhytur isha në mjerim,

Mu bëre ëndrra që unë kisha më ktheve prapë në jetë

Ma shove etjen dhe përvëlimin e shpirtit tim të shkretë

Më dhe pasardhës, një, dy, tre, jo vetëm kaq, shpëtove një jetë,

Sy për sy e dhëmb për dhëmb, ti dashuri si thikë e mprehtë,

Mendja tek ti më rri përngaherë, botën e flijoj për ty,

Po të gënjeja veten do vrisja do ta sodisja tek jepte shpirt

Kemi një jetë për të jetuar unë dhe ti në këtë botë

Do ta jetojmë siç dimë veç ne, siç ne të dyve zemra na thotë

Ajo që iku s’kthehet kurrë dhe për çfarë iku s’ka pendim

Ty lumturi unë të dua më shumë se gjakun në trupin tim

Kurrë s’ka qenë synimi im ta ribëj botën nga fillimi

Dhe as të ngjaj me një hero që për beteja jep kushtrimin

Se unë të dua më shumë se kaq me dashuri që kurrë nuk jepet

Dhe përtej botës jetë në pastë do të dua në të gjitha jetët

Që ne të ecim krah për krah a se kupton se ti u linde

Dhe unë jam lindur të jem me ty, ti për me qenë nusja ime

Ti gjysma tjetër e dëshiruar je çka mungon tek unë si burrë

Dhe unë të dua në pambarim me dashuri që s’mbaron kurrë

Ti zgjon vullkane tek unë çdo ditë je dritë e syve të mi,

Të jem krah teje si bashkim ngjyrash në paqe e harmoni

Dhe bashkë do jemi sot e mot tani e pëgjithmonë

Ngase të dua më shumë se kurrë në këtë muzg të jetës tonë